ham na but-khane men ne masjid-e-viran men rahe
hasrat-o-arzu-e-jalva-e-janan men rahe
khuun hai vo jis se ki ho daman-e-qatil rangin
khuun fasid hai jo khali sar-e-mizhgan men rahe
ham ne masnua se saane ki haqiqat paai
be-sabab ham nahin nazzara-e-khuban men rahe
subh khurshid ko dekha havas-e-ariz men
shaam se raushni-e-sham-e-shabistan men rahe
toda zunnar ko tasbih ko phenka ham ne
ishq-e-rukh tha havas-e-nur-e-darakhshan men rahe
ja-ba-ja ham ko rahi jalva-e-janan ki talash
dair-o-kaaba men phire sohbat-e-rahban men rahe
khalvat-e-dil ki na kuchh qadr ko samjhe haaji
tauf-e-kaaba ke liye dasht-o-bayaban men rahe
un asiron ko hui qaid-e-taayyun se najat
jo ki paband tire gesu-e-pechan men rahe
is zamin men ghazal ik aur bhi likkho ‘bahram’
ye do-ghazla to bhala aap ke divan men rahe
Leave a Reply