Nilofar Noor
ham mubtala-e-dard hain inkar bhi nahin
lekin kisi pe tohmat-e-azar bhi nahin
ham chahte hain aap ko inkar bhi nahin
lekin labon pe jur.at-e-iz.har bhi nahin
aati to hain labon pe mire siskiyan magar
ankhon men ansuon ke gunahgar bhi nahin
dil chahta hai gham ke ḳhazane ko bech duun
lekin mire nasib ka bazar bhi nahin
be-shak gham-e-hayat ka tum hi ilaaj ho
mera nasib ye ki main bimar bhi nahin
ḳhushbu ki aarzu hai na chahat hai nuur ki
sach sach kaho ki mujh se tumhen pyaar bhi nahin
Leave a Reply