ham ko divana jaan ke kya kya zulm na Dhaya logon ne
diin chhuḌaya dharm chhuḌaya des chhuḌaya logon ne
teri gali men aa nikle the dosh hamara itna tha
patthar maare tohmat bandhi aib lagaya logon ne
teri laTon men so lete the be-ghar ashiq be-ghar log
buḌhe bargad aaj tujhe bhi kaaT giraya logon ne
nur-e-sahar ne nik.hat-e-gul ne rang-e-shafaq ne kah di baat
kitna kitna meri zaban par qufl lagaya logon ne
‘mir-taqi’ ke rang ka ghaza ru-e-ghazal par aa na saka
‘kaif’ hamare ‘mir-taqi’ ka rang uḌaya logon ne
Leave a Reply