ham kisi ki bhi kabhi aankh ke taare na hue
jin ko chaha tha bahut vo bhi hamare na hue
Dubte naav ko dekhen miri jin ko thi ye fikr
haa.e afsos vo dariya ke kinare na hue
jo niko-kar the duniya se vo uThte hi ga.e
the jo bad-kar vo allah ko pyare na hue
kaun si sub.h vo ban kar na lab-e-bam aa.i
kaun si shaam ko khiḌki se ishare na hue
ye mohabbat to nahin ye hai mohabbat ka fareb
ham tumhare na hue tum bhi hamare na hue
atish-e-dil ka bhi kuchh soz nihan tha is men
mere ashkon ke muqabil to sharare na hue
‘soz’ ko yaad to guzre hue din kam hain magar
mahv dil se jo tire saath guzare na hue
Leave a Reply