kishwar-naheed

Hum Ki Maghlub-E-Guman The Pahle

ham ki maghlub-e-guman the pahle

phir vahin hain ki jahan the pahle

khvahishen jhurriyan ban kar ubhrin

zakhm siine men nihan the pahle

ab to har baat pe ro dete hain

vaqif-e-sud-o-ziyan the pahle

dil se jaise koi kanta nikla

ashk ankhon se ravan the pahle

ab faqat anjuman-arai hai

e’tibar-e-dil-o-jan the pahle

dosh pe sar hai ki hai barf jami

ham ki shoalon ki zaban the pahle

ab to har taaza sitam hai taslim

hadse dil pe giran the pahle

meri ham-zad hai tanhai miri

aise rishte bhi kahan the pahle

More Poems

Leave a Comment