Saqib Lakhnavi
chaman ka zikr kya ab to ḳhuda ko yaad karte hain
ḳhushi sayyad ko hoti hai jab fariyad karte hain
na sharmao agar ham shikva-e-bedad karte hain
mohabbat hai tumhari adaton ko yaad karte hain
hamari dastan-e-gham rulati hai zamane ko
vo ham hain jo zaban ghair se fariyad karte hain
ḳhuda abad rakhe ham-safiran-e-gulistan ko
jo koi phuul khulta hai to ham ko yaad karte hain
asiran-e-qafas ḳhud bhi bahut kuchh kah guzarte hain
chaman ke tazkire aapas men jab sayyad karte hain
nahin ma.alum main kis haal men huun bagh-e-alam men
qafas vaale bhi mujh ko dekh kar fariyad karte hain
ḳhud un ka husn meri dad-ḳhvahi un se karta hai
vo a.ina liye hain aur mujh ko yaad karte hain
adu sayyad gulchin kyuun ho mere nasheman ke
ye tinke bhi hain is qabil jinhen barbad karte hain
lahad par chalne vaale tham ki ham kuchh kah nahin sakte
zamin rakhti hai munh par haath jab fariyad karte hain
vo ḳhuban jahan ashkon se jin ka husn sincha tha
vahi ba.ad-e-fana miTTi miri barbad karte hain
sar-e-gor-e-ghariban kuchh na puchho hal-e-dil ‘saqib’
zamana jin ko bhula hai ham un ko yaad karte hain
Leave a Reply