Shafqat Tanveer Mirza
ham ḳharabe men basar kar ga.e ḳhamoshi se
halqa-e-mauj men gauhar ga.e ḳhamoshi se
sa.at-e-vasl qayamat ki ghaḌi Thahri thi
jism ḳhamosh the dil Dar ga.e ḳhamoshi se
azma.ish thi kaḌi ku-e-vafa men ki jahan
kaj-kulah aa.e subuk-sar ga.e ḳhamoshi se
ham tire hijr men avara-suḳhan ho nikle
zaḳhm jo tu ne diye bhar ga.e ḳhamoshi se
shikva-sanj-e-gham-e-manzil the faqat ham varna
karvan kitne safar kar ga.e ḳhamoshi se
ku-e-mahbub ki sham.on ko ḳhabar hai ki nahin
saa.e kis samt barabar ga.e ḳhamoshi se
dukh ke sannaTe men yaad a.enge tujh ko ham se
jo tire dar pe sada kar ga.e ḳhamoshi se
jaane zindan ke dar-o-bam ka andaz hai kya
na.ara-zan aa.e jo akasr ga.e ḳhamoshi se
kuchh to thi lauh-e-azal ba.is-e-barbadi-e-dil
vaar ahbab bhi kuchh kar ga.e ḳhamoshi se
koi mun.im na mila dil ka ghani ya qismat
dar-ba-dar tere gadagar ga.e ḳhamoshi se
Leave a Reply