Waheed Akhtar
ham jo TuuTe to gham-e-dahr ka paimana bane
ḳhaak men mil ke bhi ḳhak-e-rah-e-mai-ḳhana bane
kaun is bazm men samjhega gham-e-dil ki zaban
baat chhoTi si jab afsana-dar-afsana bane
sang-andazon se uncha hai bahut apna maqam
varna mumkin tha nishana sar-e-divana bane
shahr-e-janan se bhi ham laa.e mohabbat ka ḳhiraj
kya zaruri hai ki yaan vaz-e-gadayana bane
vahshat amada-e-rusva.i hai be-ḳhauf jahan
zabt ka hai ye taqaza ki tamasha na bane
zindagi ham tire itne to ḳhata-var na the
ki jise apna bana.en vahi begana bane
ik tamanna koi aisa to baḌa jurm na thi
aankh ta-marg chhalakta hua paimana bane
kya rifaqat hai yahi ai dil-e-ashufta-mizaj
dekh ham ek tire vaste kya kya na bane
ajnabi lagte hain ham apni nazar ko ḳhud hi
aap apne se na itna koi begana bane
ham pe ik umr se taari hai ḳhamoshi aisi
ek naqshe pe simaT jaa.e to afsana bane
ai mire hausla-e-gham hai yahi vaqt-e-vafa
zahr hi hasil-e-sad-umr-e-tamanna na bane
zindagi karne ke andaz to bhulo na ‘vahid’
tum ne kya sikha agar ishq saliqa na bane
Leave a Reply