Rizwana Saeed Roz
ham jo har baar ḳhvab dekhte hain
ya.ani be-kar ḳhvab dekhte hain
raat ka pahr ho ki din ka saman
ham lagatar ḳhvab dekhte hain
shahr ka mas.ala bane hue hain
ye jo do chaar ḳhvab dekhte hain
lashkari un pe TuuT paḌte hain
jitne advar ḳhvab dekhte hain
so rahe the to ḳhvab dekhte the
ho ke bedar ḳhvab dekhte hain
us kahani ki aankh raushan hai
us ke kirdar ḳhvab dekhte hain
‘roz’ ta.abir TuuT jaati hai
chahe sau baar ḳhvab dekhte hain
Leave a Reply