Mohammad Shahid Firoz
ham hain TuuTe hue ham hain haare hue
dastanon men vo jo hain maare hue
zindagi ke farebon se kis ko mafar
us ke hathon giraftar saare hue
vo jo bujhte ga.e tirgi ban ga.e
vo jo raushan rahe vo sitare hue
dekh ham bhi zabihon ke is Dher men
tere qadmon pe kab se hain vaare hue
log hain ḳhauf ki da.imi qaid men
ḳhud se milte hain sab ruup dhare hue
apne hisse men aa.i hai kya zindagi
raten biiti huiin din guzare hue
Leave a Reply