Hum Bhi Ai Dost Gham-E-Ishq Ke Mare the Kabhi

ham bhī ai dost ġham-e-ishq ke maare the kabhī

ham ne bhī chand hasīñ lamhe guzāre the kabhī

kaun mānegā kise aaj yaqīñ aa.egā

ham bhī duniyā ko dil-o-jān se pyāre the kabhī

ab ye aalam hai ḳhalāoñ meñ bhaTaktī hai nazar

zarre zarre meñ nihāñ chāñd sitāre the kabhī

ab vahī haath haiñ aur chāk-garebāñ zālim

jin se din raat tire baal sañvāre the kabhī

zindagī jin se daraḳhshāñ thī mohabbat zinda

usī ḳhākistar-e-dil meñ sharāre the kabhī

bhūlnā chāhūñ agar maiñ to bhulā bhī na sakūñ

uff vo lamhe jo tire saath guzāre the kabhī

itnī zālim to na thī gardish-e-daurāñ ‘rāhī’

itne be-bas to na ham ishq ke maare the kabhī

Leave a Comment