hujum-e-sayyargan men raushan diya usi ka
fasil-e-shab par bhi gul khila.e hua usi ka
usi ki shah par taraf taraf raqs-e-mauj-e-girya
tamam girdab-e-ḳhun pe pahra bhi tha usi ka
usi ka lams-e-gudaz raushan kare shab-e-gham
hava-e-mast-e-visal ka silsila usi ka
usi ke gham men dhuan dhuan chashm-e-rang-o-naghma
so aks-zar-e-ḳhayal bhi mojaza usi ka
usi ke honTon ke phuul bab-e-qubul chumen
so ham uTha laa.en ab ke harf-e-dua usi ka
usi se ‘ajmal’ tamam fasl-e-ghubar-e-sahra
udaas ankhon men phir bhi raushan diya usi ka
Leave a Reply