dagh-dehlvi

Hosh Aate Hi Hasinon Ko Qayamat Aai

hosh aate hi hasinon ko qayamat aai

aankh men fitnagari dil men shararat aai

kya tasavvur hai nihayat mujhe hairat aai

aaine men bhi nazar teri hi surat aai

is ada se dam-e-raftar qayamat aai

aise ham kyuun na hue un ko ye hasrat aai

roz-e-mahshar jo miri daad ki naubat aai

ye gai vo gai kab haath qayamat aai

ab isi par to hai takid vafadari ki

jab gaya jaan se main ghair ki shamat aai

kah gae taan se vo aa ke mire marqad par

sone vaale tujhe kis tarah se rahat aai

ban sanvar kar jo vo aae to ye main jaan gaya

ab gai jaan gai aai tabiat aai

rakh diya munh pe mire haath shab-e-vasl us ne

be-hijabi ke liye kaam shikayat aai

jab ye khata hai mira khun-e-jigar khata hai

dil-e-bimar ko kis chiiz pe raghbat aai

garche az-had huun gunahgar musalman to huun

pichhe pichhe mire dozakh men bhi jannat aai

main hua shefta un par vo adu par shaida

saath ke saath hi donon ki tabiat aai

umr bhar us ko kaleje se lagae rakha

tere bimar ko jis dard men lazzat aai

hijr men jaan nikalti nahin kya aafat hai

maar kar aaj ajal ko shab-e-furqat aai

apne divanon ko dekha to kaha ghabra kar

ye nai vaza ki kis mulk se khilqat aai

jazb-e-dil khinch hi laaya unhen mere dar tak

paanv padti hui har-chand nazakat aai

yuun to pamal hue saikdon mitne vaale

pahle ginti men jo aai miri turbat aai

hashr ka vaada bhi karte nahin vo kahte hain

farz kar lo jo kai baar qayamat aai

‘dagh’ ghabrao nahin ab koi dam ke dam men

lo mubarak ho taraqqi ki bhi saaat aai

More Poems

Leave a Comment