hogi vo dil men jo thani jaegi
kya hamari baat maani jaegi
Dhal chuki hai ab javani jaegi
ye sharab-e-arghavani jaegi
baad-e-tauba atish-e-sayyal-e-khum
mere ghar se ho ke paani jaegi
khizr yunhi gum rahenge umr-bhar
yunhi umr-e-javedani jaegi
tegh hi kya haath men qatil ke thi
ai hina tu bhi to saani jaegi
aae taare hijr ki shab kuchh nazar
ab bala-e-asmani jaegi
arsh par hai khush-jamalon ka mizaj
kyuun kar un ki lan-tarani jaegi
khidmat-e-maikhana kar le varna shaikh
raegan ye zindagani jaegi
maut se bad-tar budhapa aaega
jaan se achchhi javani jaegi
shokhiyan kahti hain khul khelenge vo
ab haya ki pasbani jaegi
aag ban kar jaam men aaegi mai
zamzami men ho ke paani jaegi
bosa-e-gesu se hain chin-ba-jabin
rat-bhar kya sargirani jaegi
bole sun kar dil ke pamali ka haal
kis gali ki khaak chhani jaegi
jaan se badh kar ise rakhte aziiz
kya samajhte the javani jaegi
saath laae hain qafas se na-tavan
jaate jaate na-tavani jaegi
naale karna siikh le ai andalib
ab ye tarz-e-naghma-khvani jaegi
shaikh ne mangi hai apni umr ki
mai-kade se ab purani jaegi
ja chuke hain aap kal dushman ke ghar
aaj marg-e-na-gahani jaegi
piine aaen to farishta-khu ‘riyaz’
huur ke daman men chhani jaegi