Bedam Shah Warsi
us ko duniya aur na uqba chahiye
qais laila ka hai laila chahiye
ab jo kuchh karna hai karna chahiye
aaj hi se fikr-e-farda chahiye
un buton se dil lagane ke liye
sach hai patthar ka kaleja chahiye
dekhna un ka to qismat men nahin
dekhne vaale ko dekha chahiye
vo nahin aae to vaade par na aaen
ai ajal tujh ko to aana chahiye
mujh se nafrat hai to nafrat hi sahi
chahiye ghairon ko achchha chahiye
khuld valon ko dikhane ke liye
ik tire kuche ka naqsha chahiye
aa ke ab jaata kahan hai tir-e-naz
tujh ko mere dil men rahna chahiye
tod kar ‘bedam’ but-e-pindar ko
dair ko kaaba banana chahiye
Leave a Reply