Hogi Is Dher Imarat Ki Kahani Kuchh To

hogī is Dher imārat kī kahānī kuchh to

DhūñD alfāz ke malbe meñ ma.ānī kuchh to

log kahte haiñ ki tū mujh ko burā kahtā hai

maiñ bhī sun luuñ tire hoñToñ kī zabānī kuchh to

barf ne karb kī patvār ko bhī toḌ diyā

dil ke dariyā ko atā kar de ravānī kuchh to

bhuul baiThe haiñ vo bachpan ke fasāne lekin

yaad hogī unheñ pariyoñ kī kahānī kuchh to

naqsh-e-pā tak bhī na chhoḌegī havā hai pāgal

kaun jānib mujhe jaanā hai nishānī kuchh to

tere ehsās meñ shole haiñ ye maanā ‘shahpar’

sirf rasmī hī sahī barf-bayānī kuchh to

Leave a Comment