main ret ka mahal huun mire pasban daraḳht
siine pe rok lete hain sab andhiyan daraḳht
dekhe ga.e the jis ke tale do javan badan
logon ne TukḌe TukḌe kiya vo javan daraḳht
DhunDenge ab parind kahan shaam ko panah
jangal ki aag kha ga.i sab Daliyan daraḳht
phaldar tha to gaanv use pujta raha
sukha to qatl ho gaya vo be-zaban daraḳht
suraj tha dukh ka sar pe ki thiin gham ki barishen
dasht-e-safar men mere bane sa.eban daraḳht
kaisi hava chali hai ki phir chiḳh chiḳh kar
sab ko suna ga.e hain miri dastan daraḳht
sau baar mere jism ko chhu kar ga.i bahar
phir bhi huun ‘ashk’ sukha hua nim-jan daraḳht
Leave a Reply