Poet
kaho to aaj dil-e-be-qarar kaise ho
shab-e-alam ke satae nazar kaise ho
havas yahi hai ki puchhe vo aa ke ham se kabhi
hamari diid ke ummid-var kaise ho
tadap rahe ho lahad men ki chain-o-rahat hai
kaho to mujh se ki ahl-e-mazar kaise ho
na is tarah karo pamal dil ko ashiq ke
samand-e-naz ko roko savar kaise ho
hamari raah na khoti karo khuda ke liye
hamen satao na sahra ke khaar kaise ho
kinara khvab ko hai chashm-e-tar se ashiq ke
khayal-e-jalva-e-didar-e-yar kaise ho
‘jamila’ meri zaban se na kuchh nikal jaae
vo mujh se puchhte hain baar baar kaise ho
Leave a Reply