hazin tum apni kabhi vaz.a bhi sanvaroge
qamis ḳhud hi giregi to phir utaroge
ḳhala-navardo bahut zarre intizar men hain
jahaz kaun sa patal men utaroge
utar ke niche kabhi mere saath bhi to chalo
buland khiḌkiyon se kab talak pukaroge
vo vaqt aa.ega ai mere apne sang-zanon
mahakte phulon ke gajre bhi mujh pe varoge
nikal rahi hai agar tirgi to kya tum log
sahar ke vaqt charaghon ki lau ubharoge
tumhen qalam ko lahu men Dubona aata hai
‘hazin’ zarur tumhi sher ko nikharoge
Leave a Reply