Poet
hayat-e-ulfat ki chandni men masarraton ki kami nahin hai
magar muqaddar ko kya karun main nazar vo pahli jo thi nahin hai
vo ibtida ishq ki thi ham ko gila tha jab dard-e-be-kasi ka
magar shabab-e-junun to dekho shikayat-e-be-ruḳhi nahin hai
tiri mohabbat hai zahr shirin tiri vafa.en hasin dhoke
hai laakh dushman agarche duniya magar ye tujh se buri nahin hai
hazaron tufan se ishq khele hazar dil men hujum-e-gham ho
magar fareb-e-vafa jo khaa.e vo zindagi zindagi nahin hai
kamal-e-ishq-o-vafa ke partav jahan-tahan jagmaga rahe hain
ye sab fareb-e-nigah-o-dil hai kisi men kuchh dilkashi nahin hai
vo aur honge aish-e-duniya ki arzuon men mar rahe hain
vo chiiz main kyon pasand kar luun jo hasil-e-bandagi nahin hai
tiri vafaon ke asare par had-e-tasavvur se baḌh gaya huun
maqam aisa ab aa gaya hai tiri kami bhi kami nahin
javan hai ab miri mohabbat shabab par hain miri dua.en
hai mauqa.a-e-ḳhud-kushi to ai ‘raaj himmat-e-ḳhud-kushi nahin hai
Leave a Reply