Poet
hayat-e-la-ubali mujh ko ‘farhat’ sazgar aa.i
ki istighna men ishrat be-niyaz-e-iztirar aa.i
sitam ki raah se jab bevafa.i kamgar aa.i
to phir rah-e-mohabbat se vafa kyuun sogvar aa.i
fareb-e-yak tabassum se qaba-e-gul hai sad-para
shagufon ke liye kya kya bharam le kar bahar aa.i
miri qismat mujhe manzil pe ab laa.i to kya hasil
jo din the zindagi ke vo to raste men guzar aa.i
ye kya andaz-e-qassam-e-azal tha kya navazish thi
mire hissa men le de kar hayat-e-musta.ar aa.i
tahi kashkol-e-nargis aur hai saghar ba-kaf laala
ye kis andaz se ab ke bahar-e-kam-ayar aa.i
mire kam-o-dahan ki azma.ish ke liye shayad
mai-e-do-atisha paiham ba-rang-e-nur-o-nar aa.i
hui tauq-o-salasil ko hamare jab kabhi jumbish
sada-e-rast-gari ham ko ‘farhat’ baar baar aa.i
Leave a Reply