Maqsood Anwar Maqsood
haya ki ik hasin chadar agar taani nahin hoti
tumhari sub.h raushan raat nurani nahin hoti
unhen hargiz nahin milti kabhi bhi ishq ki daulat
vo jin se zindagi men dost nadani nahin hoti
hamari laaj rakh li zindagi ki bhuul ne varna
hamari ishq ki duniya men sultani nahin hoti
dilon ko toḌne vaalo baḌha kar duriyan dekho
mohabbat fasle rakh kar bhi begani nahin hoti
mohabbat kis gali men raqs karti kis pe itrati
agar laila kisi majnun ki divani nahin hoti
qadam tapte hue sahraon pe rakkha hai majnun ne
tabhi to ishq ki duniya men virani nahin hoti
kahan se akbar-e-azam ke gulshan men bahar aati
agar chunari vo jodha.ba.i ki dhani nahin hoti
furui ishq ne ‘maqsud’ rusva kar diya hota
buzurgon ki nasihat tu ne jo maani nahin hoti
Leave a Reply