Siraj Aurangabadi
havas ki aankh siin vo chehra-e-raushan na dekhoge
to chehra to kahan pan-gosha-e-daman na dekhoge
chhupate ho so beja us jamal-e-hairat-afza kuun
miri ankhon siin dekhoge to phir darpan na dekhoge
agar us khush-dahan ke lab pe dekho rang missi ka
to phir zinhar barg-e-ghuncha-e-sosan na dekhoge
agar dekhoge aks us khat ka meri chashm-e-giryan men
lab-e-ju par bahar-e-sabza-e-gulshan na dekhoge
‘siraj’ apne siin kyuun visvas hai ai shama-ru tum kuun
kisi ashiq kuun tum mashuq ka dushman na dekhoge
Leave a Reply