havas ke biij badan jab se dil men bone laga
main ḳhud se milne ke saare javaz khone laga
rafiq-e-sub.h tha suraj se rishta-dari thi
sipah-e-shab men ye kis ka shumar hone laga
ajiib manzar-e-aḳhir tha bujhti ankhon men
vo mujh ko maar ke be-iḳhtiyar rone laga
is ehtiyat ki sarhad saza se milti hai
lahu ka naam liya astin dhone laga
phir is ke ba.ad ye saari zamin meri thi
jaga ke jab se mujhe ye zamir sone laga
Leave a Reply