havaon ka zor azmate rahe
sada ham patangen uḌate rahe
jinhen jan-o-dil men basate rahe
vo rasman ta.alluq nibhate rahe
mire ba.ad bachchon ne itna kiya
mujhe chaukhaTe men biThate rahe
vo dushman ke ḳheme men the mutma.in
abas ham lahu men nahate rahe
bache the vo patthar ki thiin muraten
fuzul aap ḳhanjar chalate rahe
kahani thi saada magar kuchh to tha
zamana ba-zid tha sunate rahe
janam se hi daani hain manzar ‘shahab’
guhar ansuon ke luTate rahe
Leave a Reply