hava o abr ko asuda-e-mafhum kar dekhun
shurua-e-fasl-e-gul hai un labon ko chuum kar dekhun
kahan kis aa.ine men kaun sa chehra damakta hai
zara hairat-sara-e-ab-o-gil men ghuum kar dekhun
mire siine men dil hai ya koi shahzada-e-ḳhud-sar
kisi din us ko taj-o-taḳht se mahrum kar dekhun
guzargahen jahan par ḳhatm hoti hain vahan kya hai
koi rah-rav palaT kar aa.e to ma.alum kar dekhun
bahut din dasht-o-dar men ḳhaak uḌate hue ‘sarvat’
ab apne sehn men apni faza men jhuum kar dekhun
Leave a Reply