hausle aur siva ho ga.e parvanon ke
sho.ale arman baḌha dete hain divanon ke
yahi aalam hai agar laghzish-e-mastana ka
Dher lag ja.enge TuuTe hue paimanon ke
taur badla na agar ahl-e-chaman ne apna
nazar a.enge manazir yahin viranon ke
ah-e-mazlum agar dil se nikal ja.egi
ḳhaak par Dher nazar a.enge aivanon ke
qissa-e-sarmad-o-mansur na chheḌ ai hamdam
varna jazbat bhaḌak uThenge divanon ke
aap mahfil men na aate to bahut achchha tha
aaj to hosh uḌe jaate hain farzanon ke
daur-e-hazir ki kashakash ka ye aalam hai ki bas
hausle past hue jaate hain insanon ke
kya bigaḌegi bhala shorish-e-tufan us ka
jis ne ruḳh moḌ diye barha tufanon ke
dosto baten banate ho sar-e-sahil kya
aao ruḳh moḌ ke dekhen zara tufanon ke
us se ummid-e-karam kya kare koi ‘kashfi’
kaam aata ho jo apnon ke na beganon ke
Leave a Reply