Poet
hausle apne rahnuma to hue
hadse gham ka aasra to hue
be-vafa hi sahi zamane men
ham kisi fan ki intiha to hue
vadi-e-gham ke ham khanDar hi sahi
aane valon ka rasta to hue
kuchh to maujen uThi samundar se
be-sabab hi sahi ḳhafa to hue
un ko apna hi gham sahi lekin
vo kisi gham men mubtila to hue
ḳhud ko begana kar ke duniya se
chand chehron se ashna to hue
ḳhanda-e-gul hue ki shola-e-jan
haal pe mere lab-kusha to hue
pattharon ke nagar men ja ke ‘nazar’
kam se kam sang-ashna to hue
Leave a Reply