sahra-e-la-hudud men tishna-labi ki ḳhair
mahaul-e-ashk-bar men lab ki hansi ki ḳhair
laffaz saare ban gae shah-e-suḳhan yahan
sadiq suḳhan-varon ki suḳhan-parvari ki ḳhair
mashriq men hind-o-chin ke bazar yuun baḌhe
jah-o-jalal-e-maghribo-bartanavi ki ḳhair
hai auraton ki dhuum zamin se falak talak
sai-e-baqa-e-shaukat-e-mardangi ki ḳhair
arzan hai musht-e-ḳhak se insan ki hayat
tahzib-e-qatl-o-ḳhun men ab zindagi ki ḳhair
har samt qatl-e-am hai maz.hab ke naam par
saari aqidaton ki ḳhuda-parvari ki ḳhair
jamhuriyat ki laash pe taqat hai ḳhanda-zan
is barahna nizam men har aadmi ki ḳhair
saara vatan samajh chuka dair-o-haram ka sach
bad-kar rahbaran ki bazigari ki ḳhair
urdu ghazal ke naam pe chalte hain chuTkule
ghalib ke faiz ‘mir’ ki us sahiri ki ḳhair
maghrib se aa gai yahan tahzib-e-barahna
mashriq tiri rivayati pakizgi ki ḳhair
andhe parakh rahe yahan me.ar-e-raushni
didavar-e-hunar tiri dida-vari ki ḳhair
Leave a Reply