Karamat Ali Karamat
haath aa gaya hai jab se shu.ur-e-ḳhudi ka saanp
siine pe loTta hai gham-e-zindagi ka saanp
apne badan se ḳhol ana ka utaar kar
phunkarta hai sham-o-sahar agahi ka saanp
main khelta huun us se magar janta huun ye
ik din mujhe Dasega na.i raushni ka saanp
kyuun man ka mor pankh na apne sameT le
angan men khelta hai gham-e-ashiqi ka saanp
mauj-e-sarab ka bhi pata duur tak nahin
shiddat se Das raha hai mujhe tishnagi ka saanp
tahzib ka khanDar hai nigahon ke samne
vo rengta hai dekhiye ik ḳhamushi ka saanp
kyuun nilkanTh ban ke na pi ja.un us ko main
jo zahr ugal raha hai gham-e-agahi ka saanp
Leave a Reply