hasin dimagh mile jagta shu.ur mile
ḳhuda kare ki tujhe raste men nuur mile
bahut hai saya-e-bedar ḳhalvat-e-gham ka
ki ḳhalvaton ke amiin be-ḳhudi men chuur mile
yahi jatan hai ki taqdir sar-nigun na rahe
use bhi is nigah-e-naz ka ghurur mile
hasin-tar ho zamana jamil-tar ho hayat
agar lagan na lage ḳhaak phir surur mile
unhen nigah ki aghosh men basaya tha
khuli nigah to vo zindagi se duur mile
vo jin ko tere taghaful ne kar diya mujrim
miri nazar ko vahi log be-qusur mile
main ḳhud hi dard se daman bacha ke guzra huun
vagarna ziist ko parvaz-e-gham zarur mile
Leave a Reply