hashr tak yaan dil shakeba chahiye
kab milen dilbar se dekha chahiye
hai tajalli bhi naqab-e-ru-e-yar
us ko kin ankhon se dekha chahiye
ghair-mumkin hai na ho tasir-e-gham
hal-e-dil phir us ko likkha chahiye
hai dil-afgaron ki dildari zarur
gar nahin ulfat madara chahiye
hai kuchh ik baaqi ḳhalish ummid ki
ye bhi miT jaa.e to phir kya chahiye
doston ki bhi na ho parva jise
be-niyazi us ki dekha chahiye
bha ga.e hain aap ke andaz o naaz
kijiye ighmaz jitna chahiye
shaiḳh hai in ki nigah jaadu bhari
sohbat-e-rindan se bachna chahiye
lag ga.i chup ‘hali’-e-ranjur ko
haal is ka kis se puchha chahiye
Leave a Reply