har samt raushnī thī jidhar bhī nazar uThī
lekin vo ik nigāh na jaane kidhar uThī
ye kaun naġhma-sañj-o-ġhazal-ḳhvāñ guzar gayā
gulshan se jhūmtī huī bād-e-sahar uThī
vo intizār-e-yār ke lamhāt al-amāñ
dard-e-jigar baḌhā to nazar sū-e-dar uThī
afsāne āñsuoñ se hazāroñ ubal paḌe
phir aaj jo nigāh mirī baam par uThī
kis ne yahāñ ‘shakeb’ kā afsāna kah diyā
ik ajnabī nigāh bhī ashkoñ se tar uThī