har qadam marhala-e-dar-o-salib aaj bhi hai
jo kabhi tha vahi insan ka nasib aaj bhi hai
jagmagate hain ufuq par ye sitare lekin
rasta manzil-e-hasti ka muhib aaj bhi hai
sar-e-maqtal jinhen jaana tha vo ja bhi pahunche
sar-e-mimbar koi mohtat khatib aaj bhi hai
ahl-e-danish ne jise amr-e-musallam maana
ahl-e-dil ke liye vo baat ajiib aaj bhi hai
ye tiri yaad hai ya meri aziyat-koshi
ek nashtar sa rag-e-jan ke qarib aaj bhi hai
kaun jaane ye tira shaer-e-ashufta-e-mizaj
kitne maghrur khudaon ka raqib aaj bhi hai