Poet
har nafas murid-e-safar hain ham
goya dukkan-e-shishagar hain ham
sham.a ke gaah taj-e-sar hain ham
gah patinge ke bal-o-par hain ham
ishq ne jab se ki hai dil kar ni
barq hain sho.ala hain sharar hain ham
rang-e-rukHsar ḳhub-ruyan hain
ah-e-ushshaq ke asar hain ham
ham hain nairangi-e-bahar ke rang
naḳhl-o-barg-o-gul-o-samar hain ham
sajda-gah hain tamam aalam ki
kis ki ye ḳhak-e-rahguzar hain ham
ahl-e-dil apne rahte hain mushtaq
goiya vasl ki ḳhabar hain ham
haal ḳhat-e-shikasta men likkha
ya.ani us se shikasta-tar hain ham
dushmani ham se ho nahin sakti
tujh se sharminda kina-var hain ham
jab se dekhi hai us ke ghar ki raah
aur ḳhana-ḳharab-tar hain ham
rashk men shor-o-shar se hain lachar
kuchh farishte nahin bashar hain ham
us ne ahval puchha ham mar ga.e
kis qadar qissa-muḳhtasar hain ham
kya karen dil nahin hai paas ‘raza’
sabr men varna be-jigar hain ham
Leave a Reply