Hashim Raza Jalalpuri
har makan abad tha yaan har makin dil-shad tha
is nagar ka naam yaaro pahle faizabad tha
kya bala tha vo musavvir jis ki har tasvir men
bulbulen azad thiin aur qaid men sayyad tha
hazrat-e-adam ne bhi jaana gunahon ke tufail
ye jahan barbad hai ki vo jahan barbad tha
marne vaale ko miyan pahli mohabbat ki tarah
nursery schōl ka pahla sabaq bhi yaad tha
ishq-zadon men protocol ka jhagḌa nahin
qais jis jangal men tha aḳhir vahin farhad tha
jis ko diction kah rahe hain muftiyan-e-reḳhta
ye naya lahja gharib-e-shahr ki ijad tha
mahfil-e-sher-o-suḳhan men kal ki shab ‘hashim’ raza
kya kahun mere alava har koi ustad tha
Leave a Reply