har lamha dil-doz ḳhamoshi chiḳh rahi hai
main huun jahan tanha.i meri chiḳh rahi hai
ghar ke sab darvaze kyuun divar hue hain
ghar se bahar duniya saari chiḳh rahi hai
ḳhali ankhen sulag rahi hain ḳhushk hain aansu
andar andar dil ki udasi chiḳh rahi hai
tufanon ne saare ḳheme toḌ diye hain
yuun lagta hai saari ḳhuda.i chiḳh rahi hai
raat ki chiḳhon se abad hua har ḳhitta
kab se naved-e-sub.h bechari chiḳh rahi hai
karobar na karna logo dekho dil hai
ik muddat se ruuh hamari chiḳh rahi hai
Leave a Reply