har ek chehre pe kanda hikayaten dekho
ḳhulus dekh chuke ho to nafraten dekho
jo ahl-e-dil ho to ehsas-e-agahi ke liye
bujhi nigahon men tahrir ayaten dekho
ragon men kholte ḳhuun ki qasam na khaao kabhi
gudaz jismon men pinhan salahiyaten dekho
jo ho sake to kabhi tapti shah-rahon par
Tapakte ḳhuun se likkhi ibaraten dekho
nafas nafas men hai ehsas–yurish-e-hasti
ḳhud apni zaat se apni baghavaten dekho
labon pe mohr-e-ḳhamoshi ke bavajud ‘raza’
guzar rahi hain jo andar qayamaten dekho
Leave a Reply