har dam shagufta-tar jo hansi men dahan hua
ghunche se pahle gul hua gul se chaman hua
zahid hua asaam hua barahman hua
is rah men rahnuma jo bana rahzan hua
surat badal gai koi pahchanta nahin
ashiq tira vatan men gharib-ul-vatan hua
qad sarv nargis aankh dahan ghuncha gul ezaar
jalve se us ke khana-e-viran chaman hua
ghairon ne baithne na diya jab kahin mujhe
main anjuman men muntazim-e-anjuman hua
tab-e-jafa-shiar ki tafrih ke liye
naala mira tarana-e-murgh-e-chaman hua
‘mushtaq’ sufiyon men to taaib hua tha kal
sunta huun aaj rindon men tauba-shikan hua