Har Bulbul-E-Mushtaq Tah-E-Dam Hai Ab Bhi

Saleem Betab

har bulbul-e-mushtaq tah-e-dam hai ab bhi

phulon ki talab ba.is-e-alam hai ab bhi

ik umr se go rasm-e-junun chhoḌ chuka hai

divana tire shahr men badnam hai ab bhi

kahne ko to har samt baharon ka saman hai

dil apna to afsurda sar-e-sham hai ab bhi

muddat se kiye baiThe hain go tark-e-mohabbat

haan ba.is-e-taskin vahi naam hai ab bhi

kis aankh se nazzara karen lala-o-gul ka

taqdis-e-nazar ba.is-e-ilzam hai ab bhi

kuchh tujh ko ḳhabar hai bhi use bhulne vaale

‘betab’ ke honTon pe tira naam hai ab bhi