haqiqaton se ulajhta raha fasana mira
guzar gaya hai mujhe raund ke zamana mira
samundaron men kabhi tishnagi ke sahra men
kahan kahan na phira le ke ab-o-dana mira
tamam shahr se laḌta raha miri ḳhatir
magar usi ne kabhi hal-e-dil suna na mira
jo kuchh diya bhi to mahrumiyon ka zahr diya
vo saanp ban ke chhupa.e raha ḳhazana mira
vo aur log the jo maang le ga.e sab kuchh
yahan to sharam thi dast-e-talab uTha na mira
mujhe tabah kiya iltifat ne us ke
use bhi aa na saka raas dostana mira
kise qubul karen aur kis ko Thukra.en
inhen savalon men uljha hai tana-bana mira
Leave a Reply