Hangama-E-Gham Se Tang Aa Kar Izhaar-E-Masarrat Kar Baithe

hangama-e-gham se tang aa kar iz.har-e-masarrat kar baithe

mash.hur thi apni zinda-dili danista shararat kar baithe

koshish to bahut ki ham ne magar paaya na gham-e-hasti se mafar

virani-e-dil jab had se badhi ghabra ke mohabbat kar baithe

hasti ke talatum men pinhan the aish o tarab ke dhare bhi

afsos hami se bhuul hui ashkon pe qanaat kar baithe

zindan-e-jahan se ye nafrat ai hazrat-e-vaiz kya kahna

allah ke aage bas na chala bandon se baghavat kar baithe

gulchin ne to koshish kar Daali suuni ho chaman ki har Daali

kanton ne mubarak kaam kiya phulon ki hifazat kar baithe

har chiiz nahin hai markaz par ik zarra idhar ik zarra udhar

nafrat se na dekho dushman ko shayad vo mohabbat kar baithe

allah to sab ki sunta hai jurat hai ‘shakil’ apni apni

‘hali’ ne zaban se uf bhi na ki ‘iqbal’ shikayat kar baithe

Leave a Comment