Poet
hangam-e-havas-kar mohabbat ke liye hai
hai jo bhi kashakash vo nadamat ke liye hai
jiina to alag baat hai marna bhi yahan par
har shaḳhs ki apni hi zarurat ke liye hai
milne tujhe aaya huun na milne ke liye hi
aamad ye miri asl men ruḳhsat ke liye hai
aḳhir ko yahi kar-gari-e-barf pighal kar
maujon ke tavassul se hararat ke liye hai
main haath na aane ka huun tere ai zamane
ya.ani mira hona tiri hasrat ke liye hai
main niind ka dar khole hue huun tiri ḳhatir
har ḳhvab mira teri sahulat ke liye hai
vo hai ki nazar aata nahin aur kisi ko
vo hai ki faqat meri basarat ke liye hai
qudarat hi ko manzur hai kuchh aur vagarna
har lamha-e-a.inda qayamat ke liye hai
imkan ne jo shahr basaya hai vahan par
har chashm-e-tamasha na.i hairat ke liye hai
Leave a Reply