hamen to gosha-nashin aur jahan bhi hona hai
yahan bhi hona hai ham ko vahan bhi hona hai
nishan bhi hai lagana nishan bhi hona hai
makan men rahte hue la-makan bhi hona hai
is ehtiyat se karna hai zindagi apni
akela chalna hai aur karvan bhi hona hai
zamin men rakhte hain paivast apni duniya ko
zamin pe rahte hue asman bhi hona hai
ik aisi qaid bhi ab ḳhud pe yuun lagani hai
zaban rakhte hue be-zaban bhi hona hai
Leave a Reply