Poet
ye dil vo hai ki ghamon se jise faragh nahin
misal laala se kya duun kuchh ek daagh nahin
gali men teri hi dil bar se gir pada dilbar
main dhundun aur kahan ja kahin suragh nahin
hai dagh-e-ishq se raushan aur ah-e-sard se sard
hamare dil ka to khas-khana be-charagh nahin
pada jahan tira naqsh-e-qadam mire gul-ru
vo gul-zamin hai kahan jo ki bagh-bagh nahin
ai mere ghuncha-dahan mere nargis-e-makhmur
tire tamashe ka mushtaq kaun baagh nahin
hai kaun ghuncha surahi bana na tere huzur
hai kaun phuul jo mai ka tire ayagh nahin
kahan ka sher kahan ki ghazal kahan ki bait
karun jo fikr bhi ab vo dil-o-dimagh nahin
na ‘azfari’ se karo nazm o nasr ka mazkur
na ji kuchh in dinon apna dimagh chagh nahin
Leave a Reply