Azad Gulati
hamari aankh men Thahra hua samundar tha
magar vo kya tha jo sahra-e-dil ke andar tha
usi ko zulf men Tanke ye aarzu kyun-kar
vo phuul jo ki tiri dastaras se bahar tha
vo vaqt aa.ega jab ḳhud tumhi ye sochogi
mila na hota agar tujh se main to behtar tha
har ek ang labalab bhara ho jaise jaam
tumhara jism tha ya mai-kade ka manzar tha
use bhi jaate hue tum ne mujh se chhin liya
tumhara gham to miri aarzu ka zevar tha
bahut qarib se dekha tha us ko ai ‘azad’
vo aarzu ka miri ik hasin paikar tha
Leave a Reply