Abdul Ahad Saaz
batin se sadaf ke dur-e-nayab khulenge
lekin ye manazir bhi tah-e-ab khulenge
divar nahin parda-e-fan band-e-qaba hai
ik jumbish-e-angusht ki mahtab khulenge
kuchh nok-palak aur tahayyur ki sanvar jaae
har jumbish-e-mizhgan men nae baab khulenge
aina-dar-aina khulega chaman-e-aks
taabir ke dar khvab pas-e-khvab khulenge
ho jaenge jab gharq sadaon ke safine
sunte hain khamoshi ke ye girdab khulenge
kya un se samaat bhi guzar paegi ai ‘saz’
vo dar jo tah-e-jumbish-e-mizrab khulenge
Leave a Reply