bujhti ragon men nuur bikharta hua sa main
tufan-e-nang-e-mauj guzarta hua sa main
har shab ujalti hui bhigi ruton ke ḳhvab
aur misl-e-aks-e-ḳhvab bikharta hua sa main
mauj-e-talab men tair gaya tha bas ek naam
phir yuun hua ki ji uTha marta hua sa main
ik dhund si falak se utarti dikha.i de
phir us men aks aks sanvarta hua sa main
dast-e-dua uTha to uTha us ke hi huzur
lekin ye kya usi se mukarta hua sa main
ab ke hava chale to bikhar ja.un duur tak
lekin tiri gali men Thaharta hua sa main
main bujh gaya to kaun ujalega tera ruup
zinda huun is ḳhayal men marta hua sa main
‘ajmal’ vo nim-shab ki dua.en kahan ga.iin
ik shor-e-agahi hai bikharta hua sa main
Leave a Reply