Sard Rishton Ki Barf Pighli Hai

sard rishton ki barf pighli hai

dhuup muddat ke baad nikli hai

niind ankhon se ye churaegi

gasht par yaad phir se nikli hai

har nai lahr men naya paani

vo jo pichhli thi ab vo agli hai

rang vo hi bharegi donon men

apni yadon ki vo jo titli hai

phuut paani men pad gai hai kya

lahr dariya banane nikli hai

mere jiine ko bas ye hai kaafi

tu hai barish hai aur titli hai

be-khayali men gir padi hogi

vo nahin janti vo bijli hai

chand ko chug gaya tha ik panchhi

chandni phir kahan se nikli hai

vajh tum hi the mere jiine ki

vajh ab bhi kahan ye badli hai

udti hai gham liye paron par jo

kaisi khush-rang si vo titli hai

tujh se tasvir teri achchhi hai

baad muddat bhi vo na badli hai