Raunaq Raza
sham-e-gham ki hai ata sub.h-e-masarrat di hai
zindagi ne hamen ehsas ki daulat di hai
kaise kaise tire ehsas ki chaTTanon ko
main ne lafzon men tarasha hai to surat di hai
meri muTThi men hai har ḳhvab ki ta.abir magar
tu ne ai vahshat-e-dil kab mujhe mohlat di hai
apne isar tah-e-lafz-o-bayan rakkhe hain
tere ikram ko sau tarah se shohrat di hai
tum ne be-dam ḳharide hain ḳhushi ke saman
ham ne har ek ḳhushi ki baḌi qimat di hai
kitne mauhum isharon se phir aane ki mujhe
DabDaba.i hui in ankhon ne davat di hai
Leave a Reply